Premios Andrés Solar 2009

La Xunta pola Defensa la Llingua Asturiana da anuncia de los ganadores de los Premios Andrés Solar na so XXV edición. Nesta ocasión el Pegollu foi pa la “Ruta del Quesu y la Sidra d’Asiegu”, iniciativa empresarial de calter turísticu. El Madreñazu foi pa Mercedes Álvarez González, Conseyera de Cultura y Turismu del Principáu d’Asturies.


La Xunta quier reconocer l’usu que fae esta iniciativa empresarial de la llingua asturiana, nun exemplu de normalidá y puesta en valor de les nuestres señes d’identidá. La Ruta incorpora l’asturianu como un elementu más, usándolu y valorándolu, na actividá divulgadora que realicen na Ruta del Quesu y la Sidra, actividá turística na que la empresa ufierta a los sos clientes un recorríu alrodiu del cabrales, la sidra y el paisaxe rural asturianu. La empresa tamién apuesta pol asturianu nel etiquetáu de los sos productos, como ye’l casu de la “Sidra Asiegu”. Pol so apueste decidiíu, ensin complexos, y exemplu de que l’asturianu nun ye un llastre, sinón daqué que xuega al nuestru favor, la Xunta pola Defensa de la Llingua Asturiana decidió concede-yos esti 2009 el El Pegollu de los Premios Andrés Solar.

Los Premios Andrés Solar tienen tamién una versión negativa, que reconoz a la persona o entidá que rescamplara pol so llabor negativu pa cola llingua asturiana. Esti dudosu honor represéntase con un “Madreñazu”, que na edición de 2009 va pa la Conseyera de Cultura y Turismu del Principáu d’Asturies, Mercedes Álvarez González. Como responsable máxima na Conseyería de Cultura de la política Llingüísitca que ta desenvolviendo’l gobiernu del Principáu, la Xunta topa un cientu de razones poles que castigala con esti premiu. La Xunta considera la política llingüística del Principáu como inexistente, ya que solo se ven determinaes iniciatives les más de les veces bastante probes, que busquen principalmente ser coartada d’un gobiernu qu’amuesa un despreciu ya iniperancia absoluta énte’l preocupante futuru del nuestru idioma. Una política llingüística na que nun se trabaya nel avance del la llingua asturiana nos medios de comunicación, nel enseñu o na alministración nun merez esi nome, colo que la Xunta pola Defensa de la Llingua Asturiana considera que Mercedes Álvarez ye bona merecedora del antipremiu.

La entrega de los Premios va facese’l día 19 d’avientu a les 19:30 hores nel Salón d’Actos del Antiguu Institutu de Xixón. L’actu va contar cola actuación musical de Lucas 15. Nesta ocasión dos miembros del grupu, Nacho Vegas y Xel Pereda, interpretarán temes del so primer discu.

Más información: www.exunta.org